A股吸食民間資本，港股跟跌唔跟升

滬港通冇令港股升。首日港股通用了不夠兩成額度，之後仲愈來愈少。總之，滬港通冇乜料到就真，最初港股成交額跌，得700億唔夠。呢排A股發威，成萬億，破世界紀錄，帶動港股有千億成交，呢幾日又縮。

李小加之前告訴過大家，滬港通不是給香港送大禮，係要搞活A股，唔少股民又唔信，高追中伏係抵死，老襯。李的觀點其實並無太大新意，只是更加細緻及專業。本地較有水平的講股佬早已說，滬港通對A股有利多於港股，當然，要炒港股的同胞會方便小小，但佢地早已係香港開哂戶口。

今日睇報紙，話大陸小股民對香港藍籌冇乜興趣，又唔可以轉移人民幣到海外變現變資產，長揸黎做乜？佢地最有興趣係仙股，大陸好少仙股，因為一上市就最少一蚊，跌左落去一蚊樓下，通常係虧損，公司揸弗人驚連虧三年被迫除牌，所以實注資產，咁又蒲番上黎。所以大陸小股民特別鍾意仙股，佢地見香港有咁多仙股，流哂口水。但香港唔係上海，我都係勸大陸股民咪亂買香港仙股。

我睇完李小加的話之後，唯一令我知多左嘅係：滬港通的主要目的是搞活A股，讓多些境外資金來投資，從而令中國銀行資產多投入A股。這樣我有一個疑問：似乎搞了十年有多的QFII對搞活A股冇乜作用，比較彈性及散戶也可玩的滬港通係唔係真係咁有用？D人唔買A股似乎係對中國企業管治、審計及監管制度冇乜信心（香港的H股好少少），而唔係冇渠道喎。我記得曹仁超講過，就 係因為這個原因，連H股都冇乜長期增長股（好似以前的滙豐），A股更加唔駛講 。

其實，搞活A股黎做乜？都係搵民間嘅錢黎填氹。銀行貸款愈黎愈謹慎，因為怕地方壞賬愈來愈多。早幾年可以靠樓市泡沫吸金，呢幾年又唔敢。融資成本咁高，企業邊度有錢？咁唯有搵個資本市場黎教飛，但股民受過教訓，唔肯投資，只想投機，中央呢個如意算盤係唔係打得響？

我唔知，但係A股就風高浪急，殺上三千點，話咁易。當人人話上5,000點，佢一日跌5%你睇。恒指跟跌唔跟升，跌500幾點。如果你有買內險內銀股，你會有錢賺，如果唔係，都幾厭悶。港股A股化，對大部份散戶來說，可能係發達冇你份，捱沽就有。

A股風雲應該有一陣玩，但係，大陸咁多人猛借孖展去買A股，共產黨呢鑊會唔會引火自焚？

留守佔領的邏輯

真是佔領人心，沒心情炒股了。恒指跌了一輪，現在又上上落落，反而美股好像一直瀉下去，我也懶理。打開報章，人人說見好就收，叫你撤。相反，打開Facebook，佔領行動戰意仍然極濃。信邊個？

何解網上網外有差別？報紙佬叫人撤，與陳日君叫人撤，理由不同，但位置一樣，都是塘邊鶴，他們都不是帶著眼罩口罩的年青人，不理解佔領者。不過，別以為佔領者是非理性，他們其實是非常理性。

幾十年前我讀經濟學時，老師介紹過一本用經濟理性解釋集體行動的書，作者是Mancur Olson，書名叫 The Logic of Collective Action。Olson說，如果理性人只是孤立的個體，追求自己利益，計過算過，沒有人會參與集體行動，因為與其親身參與，身水身汗，又要擔心警察鎮壓，倒不如讓人去爭取「大圍野」，自己坐享其成，做個free rider。但是，如果人人也是這樣，便不會有集體行動，連示威都不會有，更何況是革命。但現實上又有人組織及參與集體行動，為甚麼？

Olson提出了一個答案：因為參與者有selective incentives，即是只有局中人才會有的誘因。例如組織者滿足自己當領導的慾望，參與者獲取同志感覺，又或者冒險與衝擊當權者的過癮感覺，以及可能成功爭取的一些東西的滿足。總之就是一些日常上班上學獲取不了的，同時，也不是「真普選」那樣遙遠的運動目標。一般來說，愈參與得深，愈有滿足感，超越了暫時不上學不上班的成本，人便會繼續理性投入參與。至於局外人，通常是無法分享這些誘因的，反而覺得這些人很傻。

香港街頭的佔領者，肯定有大量selective incentives，這是香港歷史上沒發生過的長期佔領，相當新鮮的經驗。想勸退他們的人，請先去研究一下他們的incentive structure。我猜應該很複雜，可以寫幾篇論文，我沒有這個能力，這裡隨便講幾點。

1. 陰差陽錯，「支持及保護學生」的口號，加上警察的催淚彈，讓佔領者開始佔領。而警方的動作靜下來後（這幾天好像又動起來了），佔領者漸漸形成自己的行動模式，也形成自己的incentive structure。

2. 有些人說，不達目的，誓不罷休。但他們也知道，不要說「真普選」，就算是人大常委撤回框架，也近乎不可能。但是，who cares?，誘因來自佔領行動本身，而不是這個遠大目標。有人認為，自己是爭取談判及談判的籌碼，他們樂於扮演這個角色，這也是他們在衝突矛盾之中的自我定位，當籌碼本身是很意思的。只要政府沒談判，沒有談判成果，他們還是會留守。

3. 當然，佔領行動不是沒有風險與成本的。最大風險是鎮壓，成本是不上班沒薪水、阿媽阿爸壓力、沒有休息玩樂等等。不過，多次狼來了後，大家也覺得不會有六四式鎮壓，最多也是催淚彈，警察搬橡膠子彈出來嚇人，還未發過，風險的確少了。而這次自發沒組織的行動，也讓成本減少，佔領者來幾天，回去上班再來，或者白天上班，晚上留守，只要有數十及數百人仍然佔領，過半天或幾天再回來也行；現場有吃有喝，有朋友有藝術有娛樂，搞不好比平日更豐富。

4. 反佔中人士的衝擊的確增加風險與成本，例如掃場、打穿頭、給人問候老母等等，不過，反過來，這些敵人讓留守更有意義，更有滿足感。示威者本來就是在行動中追求矛盾衝突的，本來就是以一個無權無勢者身份親身對抗強權，如果現場甚麼也沒發生，反而令誘因減少。同時，反佔中者的暴力又沒有大到把他們完全趕走，這種滋擾卻提供了更多誘因，製造一些危機感。旺角被反佔中者包圍後，引來更多人反包圍，就是一個明證。

5. 自發沒組織，所以每一個個體沒有聽從領導的責任，亦沒有違反領導指令的成本（被逐出會、被排擠等等）。同時，既然自己不是領導，也沒有領導要面對的成本，例如不知如何向「公眾」交待，與其他政治精英的關係，以及公眾形象等等。泛民被人評為「走完就散水」，是因為他們的incentive structures根本與佔領者不同。

6. 我沒有做研究，但selective incentives在留守者心目中應該是很大的，其實如何量化呢？我想Olson也沒有辦法。不過，真的是很selective，甚至是exclusive的。這亦解釋了為何留守者好像不太受外圍反佔中人士及輿論的影響，要影響他們的行動及想法，也需要很長時間。既然他們不是領導，公眾壓力便會低很多。你可以想像，李卓人如果被工人及小商戶在街上持續罵幾天，他必定受不了，要讓路了。

佔領留守的selective incentives維持下去不難，但沒有進展，有被拖垮的可能。Selective incentives不是不會變，隨著遊戲的改變，亦會變化。警察常說用最低武力，其實，他們可以在最低民意反彈下清場的。既然佔領者強調和平不反抗，警察可以逐一抬走逮捕，平日早上清場，加起來最多幾百一千人左右。警察不這樣做，可能是因為怕遊戲一變，執法及司法機構會癱瘓，我也不知差佬能處理多少人。或有太多不確定因素，政府內沒有人想「孭鑊」，就讓運動自己倒下吧。不過，警察若決心如此清場，留守的誘因一時之間便會變了，打破了原來的incentive structures，被捕後佔領者不再是佔領者，要面對一堆新問題。即使放出來後要回到現場，也要重新佔馬路，重新衝擊警察防線，又是一番新的成本效益計算了。此役似乎證明，梁振英是個官僚，多於一個政治強人。

當然，能改變或打破incentive structure的不只是警察與政府，學聯及學民思潮似乎也有點能力。他們既然半意外地發動了一次前所未有的群眾運動，亦應該有能力發動了一場incentive structure不同的運動。

克林頓的虛偽，馬雲的自知之明

最近最令我想罵髒話的人，不是一副龍門客棧太監樣子的李飛，或是肥腫難分說話愈來愈慢的習近平，也不是皮笑肉不笑的梁振英，而是美國的克林頓。

阿里巴巴順利美國上市後，馬雲出席由美國前總統克林頓搞的「克林頓全球倡議大會」。克林頓這條「粉腸」說： 「目前是中國發展的重要時間，而馬雲有機會為中國帶來翻天覆地的改變」。

「改變中國論」已由冷戰辭令，變成美國的遮醜布，用來擦馬雲的新皮鞋。美帝現在要在金融財經上靠中共專制者來撐著門面，天文數字的美債之外，資金、勞力樣樣靠大陸，否則i-Phone也要賣貴幾百元，蘋果的利潤也少一截；中國權貴則靠美國金融界把國內財富來變成外幣現金與資產。所謂「中美國」，就是今天的全球帝國。

老美口中的中國人權問題早就變成騙人把戲，軟弱無力，連大龍鳳也談不上，一切便始自九十年代的克林頓，他讓人權與最惠國待遇脫勾。現在克林頓還敢大談馬雲「改變中國論」，言下之意，就是美國與中國做得愈多生意，有錢人愈有著數，便愈能改變中國，改變了甚麼？改成怎樣呢？美國人才不關心。說穿了，克林頓自己降格為中共的擦鞋仔的擦鞋仔。

如今罵美帝要罵得對，就一定要罵中共。 幾十年前冷戰水平的反美辭令，只有某些僵化了的左派才會繼續學舌，偏偏香港還有個小圈子和應。真是做了中共哈巴狗不自知，還要穿切古華拉T-shirt扮革命派。跟大家介紹一位英國「前左派」John Ross，年青時是托派出身，不過現在是跨國企業顧問，在英國唱好中國他最厲害，整天大談英國及歐洲要學中國。最近《文匯報》訪問他，唱衰佔中罷課。他罵英美國在香港政治問題上表態虛偽（其實立場已軟得不能再軟），他沒錯，英美精英很虛偽，就像克林頓那樣，但John Ross只說了一半。下一半我們該問，英美的虛偽換來甚麼？換來與中國專制者合作，因為，中共也知道英美這些國家硬不起來。John Ross的確不虛偽，因為他堂而皇之為中國專制者唱好。

馬雲的確是聰明人，有自知之明的，當了首富也不敢高興，更不敢說有能力改變中國，他說：「 你有100萬元人民幣，這是你的錢；1000萬元人民幣的時候，你開始頭痛，你開始擔心要投資，投這個、投那個、買股票、買債券；等你超過一個億的時候，這是別人給你的信任。」他當然不會說破誰是「別人」，別誤會，「別人」不是小股東，其實，除了中共這個官僚資產階級還有誰？網上一直盛傳他背後的黨政軍集團，白癡才會相信他白手興家。

中央最近召見香港一眾巨富，不知有沒有談起阿里巴巴？面聖除了要大家一起唱衰罷課佔中，究竟有甚麼吩咐？如果我是習近平，我一定跟他們講一下馬雲的故事。當中共可以土砲製造全球富豪，你們腰纏萬貫又如何？借李國章先生的話，Who cares?

該如何好好地勾結外國勢力？

北京再次亮出「國家安全」紅牌，防止勾結外國勢力人士當選，香港一眾人大政協應聲蟲附和，卻不敢詳作解釋，因為，這幫傢伙也有一堆勾結臭史，這些人嘴臉可惡亦可笑。他們反正就是要阻止政改運動，要大家「袋住先」。

勾結外國勢力從來都是中共以至中國眾多革命派的拿手本領。被中共捧為革命先行者的孫中山勾結英國政府，想搞過兩廣獨立，脫離清廷，交予英人管治；國共第一次合作時，兩黨皆勾結蘇聯人；後來老蔣找美國人，取得飛機大砲，老毛則靠斯大林，長期領過共產國際的工資、金錢及軍事援助，用今天的話來說，就是政治捐獻。

勾結外人本質上沒有好壞，只有手段與目的是否好的問題。香港泛民「勾」得不算壞（他們害了誰？），但的確差，在黎智英捐款問題上，幾位泛民議員竟然犯下低級錯誤不作申報，是為經典一例，還得一個莫須有的勾結美帝的罵名。前陣子，李柱銘與陳方安生去英國數臭北京，想「翻cheuk」英國佬，卻遭英國政客冷待，又是一例。兩位英國人培育出來的精英好像完全不了解現在英國與中國的政經關係，若果他們了解，又怎會還去把臉貼到人家的冷屁股上？若明知還去做，就真係真心膠，幾十歲人都唔化。

中共當政了，當然把反對派勾結外人說成罪大惡極，反右文革時不少人背著這個罪名被迫害致死。然而，中共嘴巴說得響，但實質還是沒有停止過勾結外國勢力。鄧小平上台以來，中共派出大量幹部官僚到資本主義社會，跟英美國金融大鱷打交道，最高領導人之一王歧山是前高盛主席兼前美國財長保爾森舊同事與老友；叱吒風雲一時的封疆大吏薄熙來，這邊唱紅打黑，那邊跟外國政商界大概也有說不清的關係，他老婆與海伍德恩怨情仇，他的手下王立軍逃入美領館失敗，這幫愛國的共產黨大員對「國家安全」不知是有害還是有利？還有，中共控制的財團及財主向美國及英國政客大灑政治獻金，黎智英區區幾千萬實在小兒科。

見不得光的叫勾結，見得光的叫外交與合作。老牌英資怡和就最能說明一切。今年1月，怡和策略入股大陸中高檔汽車代理商中升控股（881），獲配售股份及認購可換股債券，合共56.68億元。今年8月，同屬怡和系的牛奶國際入股永輝超市，該公司在上交所掛牌、以福建省為基地，涉及資金56.9億元人民幣。事實上，半年內，怡和系在內地投資金額就達到128億元。

今年6月，總理李克強訪英，與英國首相卡梅倫會面，順道簽了140億歐羅的貿易及投資協議，當中最主要是英國石油與中海油簽下120億天然氣合約。事實上，2009年至今，英國出口到中國的貨品總值翻了一翻，而英國也成為中國在歐洲的最大投資地，過去一年直接投資超過80億歐羅，創造6000個職位。香港以外，倫敦是最大的人民幣離岸結算中心。

經濟利益既是兩國良好政治關係的原因，也是結果。像怡和系這樣的英資公司，當然不放過機會。當年英國人佔香港為的是自己在中國的政經利益，今日不再統治香港的英國亦如是。肥彭女兒97年時的眼淚是廉價的肥皂劇情節，只有一些香港超齡宅男情心款款懷緬米字旗，沒有任何一位英國商賈及政客會當一回事。鈔票在眼前，他們還會有心情讀《一國兩制白皮書》？

有人漏夜趕科場，有人辭官歸故里。英資要趁勢跟中共打得火熱，跟中共勾結了幾十年的李嘉誠則不斷出售中港兩地資產，尤其是內地房地產項目。長和系去年先後出售廣州西城都薈廣場、上海陸家嘴「東方匯經OFC」。近日，和黃（13）又計劃出售和記港陸（715）七成股權，連同和記港陸所持黃浦區港陸黃浦中心及港陸廣場，售予深圳上市民企泛海控股。

市場之前憧憬和記港陸可能成為和黃的中國地產旗艦，但現在已得肯定是「賣殼」。李家不是辭官歸故里，但要趕另一個科場，他的跨國資本版圖在歐洲及不少地方如水銀瀉地，只是獨獨在大陸這一塊頻頻撤退。

正所謂，勾結有時，脫勾亦有時。

羅康瑞的上海大茶飯

幾天前，羅康瑞偕太太朱玲玲去中環，簽名反佔中。兩天後，《華爾街日報》又有「上海姑爺」羅康瑞的負面新聞。

一群外國投資者（包括香港投資者）最近從Trophy Property Development撤資，該基金原值10億美元。而基金投資上海、武漢和重慶，都由羅康瑞瑞安房地產(00272)開發，包括上海虹口區的瑞虹新城，一個佔地60公頃的商住區。,

撤資原因是工程一再拖延，超出基金的存續期限。而基金亦嚴重貶值，只剩4.15億美金，這群投資者佔12%股份，由原來1.2億縮水至不夠五千萬。投資者中有羅康瑞的親戚朋友，但講錢失感情，據說，「上海姑爺」跟這些投資者「擘哂面」。

至於工程拖延的原因，是因為拆遷安置愈來愈費時。1996年時，羅康瑞在上海搞新天地，據說，43天便完成了3800戶動遷工作，把一大片石庫門弄成高級地產項目。原因是當年居民要求低，區政府及拆遷辦又強勢配合，甚麼手段也用上了（當然，開發商不用為這些負責囉），才讓項目火速進行。項目完成後，羅康瑞名震天下，全中國大小城市也搶著找「上海姑爺」搞「新天地」，例如最近的佛山項目。不過時移世易，這大茶飯不容易啃了，拆遷不能亂來了。

上海一位朋友告訴我，維穩早已維到拆遷及開發商頭上了，不只居民不許維權抗爭，拆遷公司太粗暴的手段也不能用，萬一弄出個唐福珍這類自焚大案，許多人烏紗不保，開發商也要配合。上海作為中國第一都會，就更要小心，昔日離譜過份的強拆，讓地方政府發財，但不符合中央的利益及顏面。再一個原因，就是居民也比以前會叫價，也懂拖延，也知道政府的維穩任務，在網上也找到不少居民跟瑞安因為賠償鬧上法庭的案件。

去年，羅康瑞便說過，以後不搞拆遷項目，時間難把握，瑞安有上市吸水，但負債達50%，資金鏈容易斷，單付利息已叫人吃不消。不搞拆遷，便靠買地，但又談何容易？換言之，他建立的拆遷及市中心開發優勢已正式結束。

看看瑞安的股價，仍處低位，2元左右，卻有破下降軌的跡象。不過，市場是否已消化了這些負面因素？「上海姑爺」要搶地，是否能跟一眾大陸房地產大鱷一拼？我不太樂觀。不過，中國搞戶籍改革，城郊及二三線城市開發仍大有所為，大陸地產遊戲還是吸引的，相信羅康瑞不會容易放過。要繼續玩遊戲，「反佔中」任務是基本責任，建制派的「大圍野」，不管你是否梁振英粉絲。

佔中的無望與希望

前陣子事忙，沒寫文章好幾個月。再執筆，港股已衝上兩萬四千，北京的周永康不再是同志。可是，香港政治比較悶，還是圍繞著佔中及反佔中。

如果股民也算金融界，我也算是佔中的潛在受害者，可是我是支持佔中的，雖然我這等「廢中（年）」未必會落場。況且堵馬路，我也照落盤放盤，無影響。我支持佔中，倒不是因為我看好佔中能成就真普選，而是因為它是個凝聚泛民的難得行動綱領。在討價還價裡，弱者如無法綑綁在一起，一定輸。上次政改讓北京政府逐一擊破，拉一邊打一邊，一個搞公投，一個去中聯辦密會，泛民輸得慘，民主黨尤烈。

公民提名一定無法實現，但中央其實知道，普選搞不成，或者弄了一個假普選，特首就沒甚麼正當性了。提委會無公民提名，人家在外邊也可以搞，弄出一個有一百萬人支持的影子特首，正式選出來的特首認受性便成疑。香港問題還是解不開，也搞下去，便不只拉布及丟水杯。香港人要反抗中央與特區政府，花樣多多，手段其實只有一個，就是破壞特區政府的正當性，而且，並不是太困難。

當然，中共可以讓香港政治爛下去，我也不排除中聯辦及黨中央裡有鷹派認為，香港愈亂愈好，就像現在新疆與西藏。不過， 泛民不是疆獨藏獨份子，香港也不是新疆西藏，你不能用解放軍、武警解決問題。中聯辦的黨幹部要硬幹，枱面上沒有個像樣的代理人，也無法管好，梁振英是個例子。香港亂到某個地步，中聯辦等瘋狂到某個地步（《主場新聞》的可能死因），體制內溫和保守派，以至地產黨等本地統治階級，便有可能有機會反撲；曾鈺成「不爭為爭」之姿態，不單是他個人看通了，其背後也肯定有人。

不過，也要看習總是否真要一硬到底，是否要集權集到香港，來個急風驟雨徹底改造。友人告訴我，屬江派的劉雲山經常跟朋友說，不知道習大在想甚麼。但怎樣看，習大大應該沒有瘋到這地步。

中國政治沒有人猜得透，連官場中人也如在霧中，不知明天腦袋會否搬家（這可能是幹部頻頻自殺的原因）。我們香港人也最好不要猜度太多，天命難測，除非移民或自殺，否則最好應付北面冷風的方法，便是想想佔中及公民提名後，從政之人想想如何團結反對派，普通市民問問自己活在香港搵錢搵食兼上街反抗，究竟所為何事。繼續抗爭下去，好像以前共黨統治的波蘭團結工會那樣，同共產黨鬥長命，我相信，這已是我們最好的命了。
 
甚麼「真普選」，根本無望。香港政制民主化「無得嬴」，但社會要頑鬥下去，還是有希望的。

中 國不大變，香港不能變。周永康事件，令我確信中國仍然穩定。共產黨最高領導打貪官打到常委，打倒石油幫，可是，你看到中石油（857）、中石化（386） 有問題嗎？股價的確有因周而上落，可是沒有世界末日，連危機也不能算。事實上，十八大以來，全國風聲鶴淚，不少省份過百省市級幹部下台，但中國經濟似乎沒 有硬著陸的跡象。政治官僚屬領導幹部，他們提心吊膽，不知明天會否被「雙規」，但一大群技術官僚還是很穩當的，頂住了不只半邊天。

兩隻石油股，尤其是中石油，趁低買來作中線，應該很穩。

中國的住房需求怪圈

香港網上經常有人大嘆香港已死，又說不如移民去台灣。但是，我很懷疑這些人有多認真。我認識有幾位，一邊嘆氣，一邊生仔，一邊供樓，或為首期努力儲蓄。住房需求認真剛性。

大陸也是，有錢人可以出國移民，大部份青年蝸居蟻族也渴望在祖國置業。內地近日發表《青年藍皮書》發現，九成半年青人認為住房和幸福生活相關。無房不婚的思想支持樓市的「剛需」，但面對近期樓市的下滑亦難改根深蒂固的思維。

調查顯示，近九成五內地青年男女認為住房和幸福生活相關。「永不買房，租房居住到老」的做法有八成五的人不能接受，認為有一套屬於自己的房子是幸福所必需的男人比女人還多。男女都想小確幸。但樓價高，不足一成的人相信，單憑個人努力可以做業主，八成以上8認為要靠父母。

大陸的內需一直不振，其中一大原因是剛性住房需求。女兒兒子供樓，老子娘親挺住，全家總動員，自己的房子還未供完，便要為兒女籌謀，要找點餘錢來消費也不易。

有需求便有供應，而且，政府也需要住房。最新出爐「23個省份土地財政依賴度排名」（2012年資料）顯示，「承諾以土地出讓收入償還債務總額」，北京排第一，規模是3601億元！樓市與土地收入收入的關係如此緊密，地方政府豈可袖手旁觀、任樓市隨意垮下去？

香港出路：鬥地主

盲搶地，杯水車薪

大陸投資者「劈價」賣香港豪宅，可能是辣招以來最大效應。期望房價回落可以做業主的準中產不要開心得太早，更不要多謝CY及劏房波。大陸客蝕讓套現，大概是大陸銀根短缺所致，有錢不如回大陸放高利貸更有利可圖，香港的「磚頭」不是萬能的。

香港政府掌握土地供應各個環節，但就裝扮得一籌莫展，連「港人港地」也無聲無息地消失，令人想起老董的「不再提起便已不存在」的妙論。港府現在只剩一招：把零星分散的政府及社區用地改為住宅。這簡直是杯水車薪，數量少，開發的時間及金錢成本高，純屬盲搶地。近民居的，市民嫌密度太高，遠離民居的，又浪費基建成本。

香港財經高人早就看穿這把戲，大叫政府填海造地，當然引來環保界及愛護生態的市民反對。而且，填海也要時間，諮詢規劃程序跑完再把工程做好，恐怕也選了兩屆特首了。

土改，鬥地主

最近元朗朗屏的公屋大計要縮水，規模變了原來四分一。因為新界鄉紳不願把改為貨倉停車場等農地出售。他們當然待價而沽，想買沒那麼容易。事件引發「棕地」（Brown Land）討論，這些佔著農地作非農業用途的新界勢力，據說佔了800多公頃，政府竟然無能為力。但是，政府卻可以武力清剿菜園村的家園建高鐵，這樣誰也不服氣。政府缺了甚麼？不是民間團體說的棕土政策，而是改革的政治意志。香港人及政府太和理非非，不夠勇武。不要以我是本土派，在我眼中，喊「勇武」的本土派完全找錯對象，共產黨太大，你打不過它；來港的大陸人，打來無謂，成千上億，鬥他們只為出氣，沒意思，而且他們只是代罪羊吧。香港缺的不是族群鬥爭，是土地改革，要鬥，要鬥地主。

幾乎所有穩定的新政權都要土改，都要不同程度剷除地主勢力，平均地權。中共最出名，殺了幾十萬地主；國民黨在大陸時的失敗，部份也源於沒有土改，跟地主走得太近，所以他們敗走台灣後學乖了，馬上土改。特區政若想長治久安，一定要鬥地主。

香港地少人多，但是，你知否現在香港住宅土地的四成卻是用來建極低密度的新界小型屋宇（即村屋）？大都是以丁屋丁權形式開發，但只住了五十萬人！其餘六百幾萬人呢？擠在餘下六成土地上！這就是香港的土地問題。

廢掉「新界土地權益」

我不是要求北京政府在香港搞一次五十年代的鬥地主，幹掉新界特權階級，這樣不人道，違反香港核心價值。但是，我們可以搞一次溫和的土改，只要北京政府配合，釋法也好，修改基本法及立法（農地法、新界土地收回法等等）也好，私下交易或出言恐嚇也好，從今天起，廢掉新界人的所謂「新界土地權益」（其實是特權），港式平均地權！這樣就可釋出大量新界土地建屋。為何北京政府只敢就普選及居港權強行釋法？卻不敢動新界特權階級分毫？因為我們選民比較好欺負？因為中港家庭好應付？新界佬是北京政府的政治同盟者就要包庇？！

中央及香港建制派就是沒視野，沒有氣魄。若有人敢做，又成功，他一定當選特首！還怕甚麼公民提名、政黨提名？還怕泛民候選人不愛國？還要均衡參與式篩選？即使提名像多倫多選市長那樣，交幾千元報名費便可以，泛民要勝選門都沒！因為，親北京的候選人可以用「打倒特權，平均地權，十年建屋」口號，爭取平日不投票的六成選民，泛民即使穩拿現有的選票，但動員不到沉默大多數，中短期都不會有勝算。

敢做又成功的人，必定是建制派，只有建制派才有機會說服北京，放棄及犧牲新界佬（建制政黨也要跟新界佬割𥱊）。建制派常說，泛民不願跟中央溝通，但你建制派能溝通又如何？做不出跨黨派支持者讚賞的工作出來，溝通也沒用呀！泛民與建制派都是吃老本，香港政局一池死水。

作為泛民支持者的我提出這建議，心情也很複雜，因為這必令泛民大敗積弱。但不先死，如何後生？長遠來說，泛民要有改革香港社會、政治經濟的視野，不能只守著民主抗共的位置。而且，泛民也應先提出鬥地主口號，這樣起碼能搶點功勞，否則全輸！

一句話，鬥地主是香港出路！

「滬港通」=人仔萬歲

中央要地方勒住個褲頭。美銀美林估計，打貪反腐打擊GDP增長達0.6個百分點，事業單位財政緊縮對GDP增長的打擊是0.9個百分點。今年2月，零售及固定資產投資亦見減速，最近的GDP增長去到7.4%。

中央成個思維係令中央經濟擔子減少，唔好成日靠放水及固定投資黎谷住個經濟。「滬港通」都可能係想幫國企吸資，甚至將來可以出售優質國企資產，為銀行減債。好多國企PE都係個位數字，理想係資產價格谷番咁上下出售先啱數。

滬港股市互聯互通，對滬港兩地資本市場係唔係有利？香港個市彈兩日就唔見影，上海都唔見好興奮，睇黎唔係純粹搞旺佢咁簡單。

「滬港通」短期對股票市場冇乜影響。好多人以為AH兩地上市的股票會好快接軌，如果呢個諗法係啱，H股就要大插水了，實情冇咁兒戲。宣佈「滬港通」時，係有啲H股跌，但好快喘定。出現折價溢價其實係受兩地投資者性質、結構丶風格以、股份及資金流動性影響，唔單只係通唔通。

好似安徽海螺（914）咁，早排係高位35元左右跌落黎，最初話要同A股睇齊，A股海螺水泥（600585）得18蚊人仔左右，港紙23蚊，差左成10蚊有多。不過，安徽海螺跌到30蚊就頂住，仲有大把大行話抵買，因為水泥價升，作為生產成本的煤炭就跌價，所以利好。似乎折讓20-30%市場人士係接受。

「滬港通」最明顯影響係，未來雙向交易統一採用人民幣進行結算，加強香港作為中國離岸人民幣業務中心，人民幣在香港更廣泛使用。人仔萬歲！將來會唔會係香港所有股票用人仔標價？可能未有咁快，但對人仔嘅投資需求一定增加，美國又想迫人仔升值，中長線投資嘅人儲蓄人民幣就應該冇大錯。

作者持有安徽海螺（914）

股壇大陸化唔係咁簡單

香港呢幾年反大陸、恐大陸情緒大增，雖然「大陸化」有多少事實基礎，但係，絕大部份嘅「大陸化」說法都係大而化之，籠籠統統，冇乜分析意義。究竟係大陸乜人或乜野要黎「化」我地？而又係「化」乜，「化」左做乜呢？「化」我地D乜？

我股壇馬克思唔識咁多，既然日日睇住個市，不如同大家講下股市同中資。

香港愈黎愈多中資，八十年代至九七前，股市裡多本地華資，尤其係本地地產佬；九七後，股市裡面中資愈黎愈多，主要唔係因為回歸，而係因為中國係九十年代末要國企改革，其中之一就係讓國企進入全球資本市場，所以，王歧山同Henry Paulson係高盛做過同事。九七後一國之內嘅香港，當然係重要嘅一站。呢樣野發生左起碼十幾年了，最大的國有銀行都黎哂香港上市，唔少國有企業亦直接或間接（用控股公司黎香港上市），呢D野早就發生，唔係呢幾年嘅事。而且，唔止大陸基產黨同國企幹部令佢成事，香港人同鬼佬投行芬佬都有份，催同教佢地上市，令我地嘅資本市場所謂大陸化。

我就有個香港friend，讀大學時讀文科，但係畢業後就乘住呢個勢搵到盤滿砵滿，成日幫大陸國企包裝上市，雖然佢冇高盛、大摩咁巴閉，但係我眼中都算係大鱷一名。例如一個爛船廠，佢可以幫佢化妝，搞到一大堆工人下崗，空左間廠出黎，配合地方同中央政策，又向國有銀行借錢，搵專業人士寫計劃搞估值，未有真嘅發展時就已俾人覺得商機無限，上市吸水。

話時話，佢條友最近可能開始有少少罪疚感，雖然做左D外資投行顧問非執董之類，又要飛來飛去，但成日返黎參加遊行示威，鬧共產黨。佢愈黎愈有錢同出名，香港就愈黎愈民粹本土，共產黨就愈黎愈控制狂，唔知佢日後駛唔駛遊行示威時帶帽呢？咦，唔知佢有冇去廣東道反蝗呢？定係佢覺得自己「賣港」？

香港對國企係有策略性，主要唔係殖民香港，起碼唔係將香港變成上海，因為咁就冇價值，佢地主要係要食大茶飯。大陸政府對股市好有戒心，大家都知，外資係唔可直接投資係A股。於是，香港就係最好嘅buffer，係一個最好同外國金融資本搞三搞四嘅地方。

最近，大陸中資又有新動向。例如，母企中信集團借子公司中信泰富（267）係香港上市，將母公司2800億資產注入中信泰富，刺激中信泰富一周急升12.8%，仲傳話，中信集團要將總部搬黎香港。唔知係唔係同中央最近宣佈嘅國六條有關，要國企多利用金融渠道，呢樣野可能對香港有啟示。我諗，呢個勢會愈黎愈勁，香港唔止係國企資本市場，重係國企營運中心。從好方面諗，中央想用香港嘅法制及規管，管好國企；從壞方面諗，係用佢地嘅官商勾結文化破壞香港廉潔社會。邊樣先係？我諗都有D喇。成日講「大陸化」嘅本土主義偉大鬥士就梗係話係後者喇。

至於民企，反而多去美國上市。最近有阿里巴巴棄港赴美，亦有新浪微博，佢仲改埋個名叫「微博」。佢上個月向美國證券交易委員會遞交招股書，最高集資額為5億美元，估值為55億美元。資料顯示，新浪微博去年總收入1.883億美元，淨虧損3810萬美元，業績較前一年改善。2012年，新浪微博總收入6590萬美元，淨虧損1.025億美元。題外話，微博會唔會開始沒落，或者要轉型呢？

有人漏夜趕科場，有人辭官歸故里，唔少從美國退市的民企就計劃回港上市。去年完成私有化、內地最大戶外視頻廣告營運商分眾傳媒，計劃今年回港上市，集資規模逾100億元。除分眾外，中國連鎖經濟型商務酒店「7天」、盛大遊戲及巨人網絡都可能回流香港。

可能因為呢個原因，有人話香港股市A股化－－大陸化。即係恒生同國企指數唔係點升(呢排似係反彈，多過長升長有)，但俾人憧憬嘅公司，因為包裝加上政策，就突然炒起，炒得快有錢搵，但係炒得慢冇鼻哥！指數成分都換唔切，指數又點反映到呢D新勢力的短暫衝力呢？其實，好多國企（甚至不少民企）的長期增長動力點都冇佢上市時咁亮麗，甚至係暫時冇乜，例如國有銀行，股價麻麻地（呢排升似乎都係短暫），佢地都係睇阿爺條水，放定收？但有個基本壞盤：佢地借左一大堆地方潛在壞債俾地方政府、房地產商。

A股化？你話大陸搞衰你香港金融市場？咪睇到香港咁重要，主要原因似乎係，香港股市係大陸國企及民企加入全球金融遊戲的入口或前哨，佢地暫時都係勉強站穩，何來持續增長？呢場全球豪賭，用邱吉爾嘅話講，只不過係The End of the Beginning。

退休人士請注意... ...

J P Morgan 剛發表《2014年退休指南》（2014 Guide to Retirement），發現1993至2013年，投資者如長揸標普500指數，年均回報達9.2％。過去7年，中間有金融海嘯，標普500指數總回報也有約31%，平均年回報率也有約3.9%，都有通脹咁上下，大概做到保值。換言之，似乎長揸美股大藍籌都Okay。投資銀行可能用呢D數字說服客戶買基金，長線投資應該好過自己短炒，有人幫你睇，就更可以唔止3.9%（不過，管理費就好金）。

不過，港股冇咁好彩，恒指過去7年的平均年回報率僅僅1.4%，明顯跑輸通脹，錄得負實質回報。呢個係說明，長線買港股藍籌，都好容易得個桔，例如匯豐(00005)，7年前係紅底股，宜家80蚊都唔夠，計埋D息都打唔到和，要蝕。咁呢個係唔係短炒投機嘅理由？不過，短炒一樣係揀啱就發達，揀錯就瓜得喎。簡單黎講，諗住買股投資退休，都睇眼光同彩數，好鬼難。難怪有咁多人買樓投資，7年前隨便買間樓，到宜家都未賣，點都有得賺。

退休都要險中求，我勸你咪掣。對平民百姓黎講，退休要穩陣，並唔係靠股票呢種金錢遊戲。有錢買樓會好D，但宜家息口蘊釀上升，樓價唔會只升唔跌，都要諗過。最穩陣都係要靠政府公帑，即使你好憎D高官特首都咁話，尤其係公營醫療。冇錢睇私家醫院嘅香港人，生老病死，都離開唔到間政府醫院呀。

用慣香港政府醫院服務，可能唔覺咁重要，但係，你睇下大陸同美國就知，由中產到貧民都唔敢病。最近睇左一篇New York Times的文章，作者Eric Wee算係中產，但佢就好羡慕妒忌自己隻狗，40蚊美金左右一個月就幾乎全包。佢同佢老婆就冇隻狗咁好，一直要俾200幾蚊一個月，仲好多野唔包；係奥巴馬嘅醫療改革之後，保費仲貴左一個double都唔止，但又未窮到有資格攞政府醫保補貼資助，結果，一個月要俾成600幾美金，但係，都係好多野唔包，連急症室服務都唔係全包。

其實醫保就係變相把健康交俾資本主義嘅金錢遊戲，好唔穩陣。香港政府成日叫人買醫保，想卸膊，但如果香港真係變左美國或大陸咁，醫保主導，公立醫療系統縮皮，我諗我地好快有人佔中佔立法局佔特首辦。到時唔係學生帶頭，一定係我地呢D老餅帶頭，我地仲唔同佢死過？

反服貿，反甚麼？

國民黨要通過同大陸簽嘅服貿協訂，搞到學生佔立法院，星期日晚仲佔領埋行政院，搞到同警察打起黎。 

好多人話，係大陸資本主義（定社會主義？）侵佔台灣，仲講到大陸殖民寶島。 其實有D誇張，未來大陸係唔係殖民 到台灣我唔知，但宜家未得。相反，台灣資本早就殖民大陸好耐，剝削大陸同勞工污染環境幾十年，搞左好多台灣小帝國，富士康就係好例子。 呢個年代，有錢有權力就可以殖民人地， 一個國家嘅統治階級可以係殖民者，但係老百姓可以係被殖民者，大陸就係一個例子 。大陸政府同資本梗係想殖民或控制台灣啦，但係又未有咁快做到。 宜家共產黨係想用服貿協助統一，所以給台灣大資本好多好處。你話共產黨嘅統一係殖民大計都Okay，但未有咁快。

抗爭嘅學生話，宜家好多大學生月入得22K台幣(5000蚊港紙左右)，好多年都冇加人工，服貿會增加競爭，令佢地小生意更難做，收入更差。 但係點解服貿未通過，佢地就已經咁低人工，冇人工加？

台灣大學生收入差有好多原因(例如大學生數目眾多)，當中與大陸有關的因素，主要唔係大陸政府，甚至唔係ECFA，而係去大陸的台商以及中上階級嘅台幹。台商早就就去大陸，最初只係去剝削廉價勞工土地等等，但最近十幾年仲搬埋資金、技術、產業、一家大細過去。例如，單單長三角就據說過百萬人，連大學同學會聚會都可以係上海搞。數目多到連生意失敗流落大陸嘅都一大堆，被人叫台流。

台商移往大陸，唔單只把大量中層及基層工種帶走，或不在台灣製造就業機會。而且，冇左呢班人係台灣，或者佢地少左係台灣，各類服務產品的消費需求都減少，咖啡都飲少杯(呢個可能係台灣通脹極溫和嘅原因)。但係，呢班人可能始終家在台灣，所以他們賺番黎嘅錢可能會用黎買台灣嘅樓，因為又可自用又可保值，尤其係北部地區，結果台北等地房價升，搞到渴望成為中產者連成家立室都好難，亦難向上流動。

服貿最大嘅問題，並唔係陸資黎台灣競爭，而係加速以上嘅流動同循環，對老百姓不利。國民黨又為了討好資本家,討好共產黨，想快快脆通過，咁就出事。尤其是台灣政府一直唔夠努力令台灣產業升級，升級了的產業又外移到大陸。例如，以前台商聚在東莞等珠三角地區，利用廉價勞工；近十年有技術有資金的都遷至上海、蘇州等，形成中高科技產業區，咁就說明高增值的台灣產業在大陸膨脹，但就可能冇乜係台灣。例如訊息科技有關的產業就好明顯。

據說，就連台灣醫生都開始外流大陸，無他，大陸醫療高度商品化，係最賺錢的行業之一。見錢開眼嘅大陸醫院，香港人好熟識。宜家台灣醫院只可在上海自貿區開醫院，但服貿卻讓台資在全國開獨資或合資醫院，這對台灣的財團法人醫院黎講，係一塊肥肉。相反，台灣只開放養老市場予中資，還要合資，台資要有51%或以上。

香港上市嘅大陸醫療股好多，但係都係搞藥多，純醫院好似只有鳳凰醫療(1515)， 截至今年6月底止，共經營11家綜合醫院、1家中醫院及28家社區診所，共計3,213張營運床位，以去年營運床位計，係全國最大私立醫院集團。醫院設備及人員質素高過公立醫院幾班，以北京為基地，強國富人集中地，需求龐大。近三年盈利增長率高達50.3%，認真利害。上市集資約12億，超額認購500幾倍，成為去年凍資王。上市價8蚊唔駛，即日上到9個幾，升左兩成半。之後去到14蚊左右回落，最近咬著12蚊。如果唔嫌市盈率40倍以上咁高，有得諗。

咁學生宜家係反乜野？似乎唔係台灣人民反大陸(當然，心理上好多人係反中同恐中)，而係反緊整個依賴大陸市場嘅台灣中上階級與財團，而且，阻止服貿只係令佢地冇咁方便。當然，國民黨作為最大推手，就孭梗鑊喇。

作者並無持有以上提及的公司之股票。

地產股腳軟，還是地產霸權腳軟？

尋日美國聯儲局主席耶倫話，停止買債6個月後加息，即係話最快明年第一季。 立即搞到香港地產股下跌， 好多地產股跌到幾年低位， 但係我都係勸你咪撈底。好多二手樓立即劈價，個勢唔得。

其實我股壇馬克思好少買地產股 。九七前買過信和，真係信佢就"和"，金融風暴時跌到阿媽都唔認得。 當然，我又錯過左零三年之後一次地產狂潮，但係樓價升得快過地產股價，我冇錢買樓投資，又冇錢買樓住，所以都係唔恨得咁多。

其實唔單止外圍環境唔就香港地產股，香港及中國因素都令地產業冇以前咁好景。所以幾年前開始鬧地產霸權，可能係鬧緊一個沒落中嘅霸權。

宜家香港搞大型地產發展好難， 李嘉誠將天水圍魚塘濕地發展成為房地產社區，係政府配合下，唔駛二十年成個社區似模似樣，雖然被人話係悲情城市。你估下宜家新界東北要幾耐 ?同埋，如果房地產仲係以前咁好搵，你估四叔會唔會捐地？香港有D人日日睇實土地規劃及城規，隨時搞到反高鐵及反新界東北咁嘅抗爭規模，政府同財團霸王硬上弓都唔易，仲要花好多時間跟民間糾纏。

雖然，大陸房地產冇十幾年前咁好搵，但係點都好過香港，大陸地方政府同財團可以亂咁圈地，香港唔得。大陸有居民農民反抗開發拆遷，就可以搵拆遷隊、黑社會同警察搞掂佢地。尋晚無線新聞講京津冀，加埋有好多個香港咁大，北京市郊有好多個天水圍咁上下規模嘅「睡城」（日日淨係返去瞓覺，日頭要去市中心返工，好夜先返到屋企），仲話D樓起極都唔夠住。大陸圈地利益太吸引，所以連香港政府裡面都有人諗去南沙搞「香港園」，呢種係狂想，但係就一D都唔奇。

我睇同樣跌左落黎嘅碧桂園(2007)同恒基(0012)，我揀碧桂園，PE差唔多，個位數字，但係前者已跌到兩三年低位，兼有發展空間。

其實香港地產佬唔係笨實，有人早就北上發展，好似羅康瑞嘅瑞安房地產（00272）就最早又最進取(今日有反彈，但呢排跌到殘)，但係跟大陸佬爭仲差幾皮；又好似阿誠哥咁，一早去左歐洲搞電訊同水電等等，又係加拿大搞能源。無他，為左錢啫，唔通真係家在香港，就外面有錢都唔搵咩，冇乜錢嘅中產都識去台灣移民開民宿喇。

所以，所謂地產霸權自己內部早就都四分五裂，又點維持香港地產黨嘅威勢呢？唐英年落選，梁振英上位，只係為已不成氣候半只腳入左墳墓嘅地產黨釘上幾口棺材釘啫。誠哥宜家先後悔冇參政？係唔係太遲？

早排練乙錚呼召李嘉誠既良心同正義感，改革香港，搞咩稅本福利主義， 重建香港（地產黨統治嘅香港），解決當前困局。 一個新自由主義經濟右派去叫個大商家孭咁重社會責任，係唔係太搞笑。我諗都係講下就算， 咪發夢啦。佢老人家同一眾地產佬都係有心冇力，佢地錢就大把，攞少少出黎搞媒體唱衰梁振英應該得嘅，其他就免問嘞。

作者並無持有以上提及的公司之股票。

老毛以前話中國資產階級軟弱，香港都係。

維基同馬化騰都頭痕

最近了市場有兩間股價急挫嘅公司， 一間係騰訊，一間係王維嘅基香港電視。

騰訊（700）由六百幾蚊跌到五百三四十， 香港電視（1137）仲大鑊，由三個幾到兩個幾，超過兩成。 跌成咁，好多人損手，但又好多人想趁低買番兩手。

呢兩間公司的故仔當然係好唔同， 但係都有一個共同特點，就係要打破舊勢力嘅壟斷。

香港電視嘅故仔香港人當然知道，王維基要打破解無線壟斷。騰訊呢，其實係關於中國大陸金融市場壟斷。

騰訊同緊幾間公司，好似支付寶、中信銀行（998）搞緊 虛擬信用卡，本來大家都睇好嘅， 其實呢個都係騰訊股價猛咁升嘅原因。但係，突然之間人民銀行下左個命令，要將你個虛擬信用卡叫停，點解會咁?一般估計，係因為，中國大陸銀行界，包括搞銀行信用卡服務嘅銀聯，從中作梗。因為虛擬信用卡如果係得，咁就唔需要用銀聯信用卡去做網上購物，甚至可以係網外購物，繞過左銀聯。所以中國大陸嘅銀行界壟斷者當然唔會放過你啦，除非佢地可以係你嘅利潤裡分一杯羹。

呢個故事說明，資本主義嘅遊戲基本上都係壟斷，唔只係香港嘅電視業，唔只係大陸互聯網事業，亦包括金融業相關的業務，往往都係壟斷者玩曬。呢啲行業都涉及好多政府規管，所以政府規管往往都係偏幫壟斷者。呢個道理一字咁淺，但係香港仲有好多讀好多書嘅人，包括好有聲望嘅評論人學者(好似練乙錚咁),仲係度講資本主義自由市場，其實佢地講緊嘅都係一個神話。

香港電視機王維基知道，騰訊既馬化騰都知道，佢地既遊戲係一個壟斷遊戲，要打破壟斷談何容易？ 熊彼得講過，企業家精神就係破壞性創造，其實現實係冇咁浪漫，亦冇咁英雄主義  。一個有過千億，一個有十幾億，一樣冇符，都幾頭痕。 當然佢地唔係傻嘅，佢地要玩遊戲，就知道要點樣同壟斷者妥協，如果我地係當佢地係英雄,咁我地就係傻瓜。

作者並無持有以上提及的公司之股票。