退休人士請注意... ...

J P Morgan 剛發表《2014年退休指南》（2014 Guide to Retirement），發現1993至2013年，投資者如長揸標普500指數，年均回報達9.2％。過去7年，中間有金融海嘯，標普500指數總回報也有約31%，平均年回報率也有約3.9%，都有通脹咁上下，大概做到保值。換言之，似乎長揸美股大藍籌都Okay。投資銀行可能用呢D數字說服客戶買基金，長線投資應該好過自己短炒，有人幫你睇，就更可以唔止3.9%（不過，管理費就好金）。

不過，港股冇咁好彩，恒指過去7年的平均年回報率僅僅1.4%，明顯跑輸通脹，錄得負實質回報。呢個係說明，長線買港股藍籌，都好容易得個桔，例如匯豐(00005)，7年前係紅底股，宜家80蚊都唔夠，計埋D息都打唔到和，要蝕。咁呢個係唔係短炒投機嘅理由？不過，短炒一樣係揀啱就發達，揀錯就瓜得喎。簡單黎講，諗住買股投資退休，都睇眼光同彩數，好鬼難。難怪有咁多人買樓投資，7年前隨便買間樓，到宜家都未賣，點都有得賺。

退休都要險中求，我勸你咪掣。對平民百姓黎講，退休要穩陣，並唔係靠股票呢種金錢遊戲。有錢買樓會好D，但宜家息口蘊釀上升，樓價唔會只升唔跌，都要諗過。最穩陣都係要靠政府公帑，即使你好憎D高官特首都咁話，尤其係公營醫療。冇錢睇私家醫院嘅香港人，生老病死，都離開唔到間政府醫院呀。

用慣香港政府醫院服務，可能唔覺咁重要，但係，你睇下大陸同美國就知，由中產到貧民都唔敢病。最近睇左一篇New York Times的文章，作者Eric Wee算係中產，但佢就好羡慕妒忌自己隻狗，40蚊美金左右一個月就幾乎全包。佢同佢老婆就冇隻狗咁好，一直要俾200幾蚊一個月，仲好多野唔包；係奥巴馬嘅醫療改革之後，保費仲貴左一個double都唔止，但又未窮到有資格攞政府醫保補貼資助，結果，一個月要俾成600幾美金，但係，都係好多野唔包，連急症室服務都唔係全包。

其實醫保就係變相把健康交俾資本主義嘅金錢遊戲，好唔穩陣。香港政府成日叫人買醫保，想卸膊，但如果香港真係變左美國或大陸咁，醫保主導，公立醫療系統縮皮，我諗我地好快有人佔中佔立法局佔特首辦。到時唔係學生帶頭，一定係我地呢D老餅帶頭，我地仲唔同佢死過？

反服貿，反甚麼？

國民黨要通過同大陸簽嘅服貿協訂，搞到學生佔立法院，星期日晚仲佔領埋行政院，搞到同警察打起黎。 

好多人話，係大陸資本主義（定社會主義？）侵佔台灣，仲講到大陸殖民寶島。 其實有D誇張，未來大陸係唔係殖民 到台灣我唔知，但宜家未得。相反，台灣資本早就殖民大陸好耐，剝削大陸同勞工污染環境幾十年，搞左好多台灣小帝國，富士康就係好例子。 呢個年代，有錢有權力就可以殖民人地， 一個國家嘅統治階級可以係殖民者，但係老百姓可以係被殖民者，大陸就係一個例子 。大陸政府同資本梗係想殖民或控制台灣啦，但係又未有咁快做到。 宜家共產黨係想用服貿協助統一，所以給台灣大資本好多好處。你話共產黨嘅統一係殖民大計都Okay，但未有咁快。

抗爭嘅學生話，宜家好多大學生月入得22K台幣(5000蚊港紙左右)，好多年都冇加人工，服貿會增加競爭，令佢地小生意更難做，收入更差。 但係點解服貿未通過，佢地就已經咁低人工，冇人工加？

台灣大學生收入差有好多原因(例如大學生數目眾多)，當中與大陸有關的因素，主要唔係大陸政府，甚至唔係ECFA，而係去大陸的台商以及中上階級嘅台幹。台商早就就去大陸，最初只係去剝削廉價勞工土地等等，但最近十幾年仲搬埋資金、技術、產業、一家大細過去。例如，單單長三角就據說過百萬人，連大學同學會聚會都可以係上海搞。數目多到連生意失敗流落大陸嘅都一大堆，被人叫台流。

台商移往大陸，唔單只把大量中層及基層工種帶走，或不在台灣製造就業機會。而且，冇左呢班人係台灣，或者佢地少左係台灣，各類服務產品的消費需求都減少，咖啡都飲少杯(呢個可能係台灣通脹極溫和嘅原因)。但係，呢班人可能始終家在台灣，所以他們賺番黎嘅錢可能會用黎買台灣嘅樓，因為又可自用又可保值，尤其係北部地區，結果台北等地房價升，搞到渴望成為中產者連成家立室都好難，亦難向上流動。

服貿最大嘅問題，並唔係陸資黎台灣競爭，而係加速以上嘅流動同循環，對老百姓不利。國民黨又為了討好資本家,討好共產黨，想快快脆通過，咁就出事。尤其是台灣政府一直唔夠努力令台灣產業升級，升級了的產業又外移到大陸。例如，以前台商聚在東莞等珠三角地區，利用廉價勞工；近十年有技術有資金的都遷至上海、蘇州等，形成中高科技產業區，咁就說明高增值的台灣產業在大陸膨脹，但就可能冇乜係台灣。例如訊息科技有關的產業就好明顯。

據說，就連台灣醫生都開始外流大陸，無他，大陸醫療高度商品化，係最賺錢的行業之一。見錢開眼嘅大陸醫院，香港人好熟識。宜家台灣醫院只可在上海自貿區開醫院，但服貿卻讓台資在全國開獨資或合資醫院，這對台灣的財團法人醫院黎講，係一塊肥肉。相反，台灣只開放養老市場予中資，還要合資，台資要有51%或以上。

香港上市嘅大陸醫療股好多，但係都係搞藥多，純醫院好似只有鳳凰醫療(1515)， 截至今年6月底止，共經營11家綜合醫院、1家中醫院及28家社區診所，共計3,213張營運床位，以去年營運床位計，係全國最大私立醫院集團。醫院設備及人員質素高過公立醫院幾班，以北京為基地，強國富人集中地，需求龐大。近三年盈利增長率高達50.3%，認真利害。上市集資約12億，超額認購500幾倍，成為去年凍資王。上市價8蚊唔駛，即日上到9個幾，升左兩成半。之後去到14蚊左右回落，最近咬著12蚊。如果唔嫌市盈率40倍以上咁高，有得諗。

咁學生宜家係反乜野？似乎唔係台灣人民反大陸(當然，心理上好多人係反中同恐中)，而係反緊整個依賴大陸市場嘅台灣中上階級與財團，而且，阻止服貿只係令佢地冇咁方便。當然，國民黨作為最大推手，就孭梗鑊喇。

作者並無持有以上提及的公司之股票。

地產股腳軟，還是地產霸權腳軟？

尋日美國聯儲局主席耶倫話，停止買債6個月後加息，即係話最快明年第一季。 立即搞到香港地產股下跌， 好多地產股跌到幾年低位， 但係我都係勸你咪撈底。好多二手樓立即劈價，個勢唔得。

其實我股壇馬克思好少買地產股 。九七前買過信和，真係信佢就"和"，金融風暴時跌到阿媽都唔認得。 當然，我又錯過左零三年之後一次地產狂潮，但係樓價升得快過地產股價，我冇錢買樓投資，又冇錢買樓住，所以都係唔恨得咁多。

其實唔單止外圍環境唔就香港地產股，香港及中國因素都令地產業冇以前咁好景。所以幾年前開始鬧地產霸權，可能係鬧緊一個沒落中嘅霸權。

宜家香港搞大型地產發展好難， 李嘉誠將天水圍魚塘濕地發展成為房地產社區，係政府配合下，唔駛二十年成個社區似模似樣，雖然被人話係悲情城市。你估下宜家新界東北要幾耐 ?同埋，如果房地產仲係以前咁好搵，你估四叔會唔會捐地？香港有D人日日睇實土地規劃及城規，隨時搞到反高鐵及反新界東北咁嘅抗爭規模，政府同財團霸王硬上弓都唔易，仲要花好多時間跟民間糾纏。

雖然，大陸房地產冇十幾年前咁好搵，但係點都好過香港，大陸地方政府同財團可以亂咁圈地，香港唔得。大陸有居民農民反抗開發拆遷，就可以搵拆遷隊、黑社會同警察搞掂佢地。尋晚無線新聞講京津冀，加埋有好多個香港咁大，北京市郊有好多個天水圍咁上下規模嘅「睡城」（日日淨係返去瞓覺，日頭要去市中心返工，好夜先返到屋企），仲話D樓起極都唔夠住。大陸圈地利益太吸引，所以連香港政府裡面都有人諗去南沙搞「香港園」，呢種係狂想，但係就一D都唔奇。

我睇同樣跌左落黎嘅碧桂園(2007)同恒基(0012)，我揀碧桂園，PE差唔多，個位數字，但係前者已跌到兩三年低位，兼有發展空間。

其實香港地產佬唔係笨實，有人早就北上發展，好似羅康瑞嘅瑞安房地產（00272）就最早又最進取(今日有反彈，但呢排跌到殘)，但係跟大陸佬爭仲差幾皮；又好似阿誠哥咁，一早去左歐洲搞電訊同水電等等，又係加拿大搞能源。無他，為左錢啫，唔通真係家在香港，就外面有錢都唔搵咩，冇乜錢嘅中產都識去台灣移民開民宿喇。

所以，所謂地產霸權自己內部早就都四分五裂，又點維持香港地產黨嘅威勢呢？唐英年落選，梁振英上位，只係為已不成氣候半只腳入左墳墓嘅地產黨釘上幾口棺材釘啫。誠哥宜家先後悔冇參政？係唔係太遲？

早排練乙錚呼召李嘉誠既良心同正義感，改革香港，搞咩稅本福利主義， 重建香港（地產黨統治嘅香港），解決當前困局。 一個新自由主義經濟右派去叫個大商家孭咁重社會責任，係唔係太搞笑。我諗都係講下就算， 咪發夢啦。佢老人家同一眾地產佬都係有心冇力，佢地錢就大把，攞少少出黎搞媒體唱衰梁振英應該得嘅，其他就免問嘞。

作者並無持有以上提及的公司之股票。

老毛以前話中國資產階級軟弱，香港都係。

維基同馬化騰都頭痕

最近了市場有兩間股價急挫嘅公司， 一間係騰訊，一間係王維嘅基香港電視。

騰訊（700）由六百幾蚊跌到五百三四十， 香港電視（1137）仲大鑊，由三個幾到兩個幾，超過兩成。 跌成咁，好多人損手，但又好多人想趁低買番兩手。

呢兩間公司的故仔當然係好唔同， 但係都有一個共同特點，就係要打破舊勢力嘅壟斷。

香港電視嘅故仔香港人當然知道，王維基要打破解無線壟斷。騰訊呢，其實係關於中國大陸金融市場壟斷。

騰訊同緊幾間公司，好似支付寶、中信銀行（998）搞緊 虛擬信用卡，本來大家都睇好嘅， 其實呢個都係騰訊股價猛咁升嘅原因。但係，突然之間人民銀行下左個命令，要將你個虛擬信用卡叫停，點解會咁?一般估計，係因為，中國大陸銀行界，包括搞銀行信用卡服務嘅銀聯，從中作梗。因為虛擬信用卡如果係得，咁就唔需要用銀聯信用卡去做網上購物，甚至可以係網外購物，繞過左銀聯。所以中國大陸嘅銀行界壟斷者當然唔會放過你啦，除非佢地可以係你嘅利潤裡分一杯羹。

呢個故事說明，資本主義嘅遊戲基本上都係壟斷，唔只係香港嘅電視業，唔只係大陸互聯網事業，亦包括金融業相關的業務，往往都係壟斷者玩曬。呢啲行業都涉及好多政府規管，所以政府規管往往都係偏幫壟斷者。呢個道理一字咁淺，但係香港仲有好多讀好多書嘅人，包括好有聲望嘅評論人學者(好似練乙錚咁),仲係度講資本主義自由市場，其實佢地講緊嘅都係一個神話。

香港電視機王維基知道，騰訊既馬化騰都知道，佢地既遊戲係一個壟斷遊戲，要打破壟斷談何容易？ 熊彼得講過，企業家精神就係破壞性創造，其實現實係冇咁浪漫，亦冇咁英雄主義  。一個有過千億，一個有十幾億，一樣冇符，都幾頭痕。 當然佢地唔係傻嘅，佢地要玩遊戲，就知道要點樣同壟斷者妥協，如果我地係當佢地係英雄,咁我地就係傻瓜。

作者並無持有以上提及的公司之股票。